Kalsvæði lagfærð á Urriðavelli

Nú á næstu dögum munu vallarstarfsmenn ráðast í nokkur brýn og aðkallandi verkefni á Urriðavelli til að koma vellinum í sitt allra besta ásigkomulag. Vallarstjóri hefur tekið þá ákvörðun að loka tímabundið inn á sjöttu flöt. Dúkur verður settur yfir flötina og er markmiðið að ná betri sprettu í flötinni sem hefur ekki náð sér á strik eftir harðan vetur þar sem mikill klaki setti sitt mark. Bráðabirgðaflöt verður sett upp fyrir framan 6. flöt og má búast við að það ástand vari í um viku.

Einnig verður ráðist í að sanda og sá í svæði sem urðu fyrir kalskemmdum í vetur og hafa ekki náð sér að fullu. Samfara verður vökvun á þessum svæðum stóraukin. Við viljum biðja kylfinga um að sýna vallarsstarfsmönnum og vinnusvæði þeirra aukið tilitssemi og tryggja öryggi þeir með því að slá ekki í átt til þeirra að óþörfu.

Um er að ræða tímabundin verkefni sem munu auka gæði Urriðavallar í sumar og auka upplifun kylfinga.